METRO MANILA, Philippines — Sa muling pagharap naman ni Shiela Guo sa pagdinig, muli itong nagisa ukol sa kanilang pagtakas ng Pilipinas noong Hulyo kasama ang kanyang kapatid na si dating Mayor Alice Guo ng Bamban, Tarlac.
Natanong na rin siya sa relasyon ni Alice Guo kay Mayor Dong Calugay ng Sual, Pangasinan.
Ayon kay Shiela, alam niya na kakilala ni Alice si Calugay ngunit hindi niya alam kung may relasyon ang dalawa o magkasosyo sa negosyo.
BASAHIN: Shiela Guo, Cassandra Ong sasampahan ng mga kasong kriminal
Duda ang mga senador sa mga sagot ni Shiela, na iginiit na hindi niya alam ang mga isasagot sa ilang tanong kasama na ang pagkakapangalan sa kanya ng isang aqua farm sa Sual at ang pagkakaroon ng resident ID mula sa lokal na pamahalaan.
Samantala, muling hindi nakaharap si Cassandra Li Ong sa pagdinig ng Senado ukol sa pagkakasangkot ni dating Bamban Mayor Alice Guo o Guo Hua Ping.
Base sa sulat mula sa Kamara, kasalukuyang nasa-ospital si Ong dahil sa low blood sugar.
Nabanggit sa sulat na hindi din nakaharap si Ong sa pagdinig sa Kamara base na rin sa rekomendasyon ng mga doktor ng Mababang Kapulungan na isugod na ito sa ospital at kailangan itong manatili doon ng hanggang tatlong araw para bumuti ang kanyang kondisyon.
Ang sulat na mula kay House Committee on dangerous drugs secretary Arthur Catarata ay may petsang ika-4 ng Setyembre 2024.