Hindi pa kinakailangan na itaas ang alert level sa Israel sa kabila nang isinagawang drone at missile attack ng Iran sa Israel kamakailan, ayon sa Department of Foreign Affairs (DFA).
Kayat nananatili ang Alert Level 2 sa Israel, nangangahulugan na ipinagbabawal pa ang pagpapadala ng overseas Filipino workers (OFWs).
Hinikayat din ng kagawaran ang mga Filipino na kung hindi naman mahalaga ang pagbiyahe sa Israel ay makakabuti na ipagpaliban na ito.
At kung kailangan na bumiyahe, nagbilin ang DFA, na mag-ingat na lamang ng husto.
“If travel to Israel is absolutely necessary, Filipinos are advised to follow all precautions. Furthermore, all Filipinos in the region are advised to be alert and updated with the security pronouncements of their host governments,” ang pahayag ng DFA.
Pinayuhan din ang mga Filipino na kasalukuyang nasa Israel na makipag-ugnayan sa kanilang community leaders, gayundin sa mga embahada at konsulado ng Pilipinas.