Mga estudyante tuturuan ng iwas-droga tips-DepEd
Bukod sa mga masasamang epekto ng iligal na droga sa kalusugan, ituturo na rin sa mga estudyante kung paano malalaman kung ang isang tao ay nagtutulak ng droga at kung paano ito tatanggihan o iiwasan.
Ayon kay Education Sec. Leonor Briones, isa sa mga magiging pagbabago sa Department of Education (DepEd) sa ilalim ng kaniyang pamumuno ay ang pagsiyasat at pagpapalakas ng syllabus tungkol sa drug education.
Maliban dito, posible pa aniyang magpatupad sila ng hiwalay na subject tungkol dito alinsunod na rin sa isinusulong na polisiya ni Pangulong Duterte laban sa iligal na droga.
Ayon pa kay Briones, naatasan na sila ng pangulo na simulan na ang pagre-review sa syllabus, at iniutos na simulan ang pagtuturo ng drug literacy mula sa mga estudyanteng Grade 4.
Sa kasalukuyang curriculum naman ay kasama na ang drugs syllabus, ngunit kulang ito sa mga praktikal na aspeto na maaring makatulong sa mga bata na makaiwas sa tukso ng droga.
Dapat aniyang maituro sa mga bata kung paano nila malalaman kung sila ba ay ine-engganyo na sa ganitong iligal na gawain, kung paano sila tatanggi at kung saan sila dapat magsumbong sakaling may mag-alok sa kanila nito.
Handa rin aniyang tumulong si PNP Chief Ronald dela Rosa sa pagpapatibay ng curriculum ng Grade 4 students kaugnay sa pag-laban sa iligal na droga.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.