Taas-presyo sa gasolina, diesel bukas

Magpapatuloy bukas ang pagtaas ng presyo ng mga produktong-petrolyo.

Sa magkakahiwalay na abiso ng mga kompaniya ng langis, P1.30 ang madadagdag sa halaga ng kada litro ng gasolina, samantalang P0.95 naman sa diesel o krudo.

Walang magiging paggalaw sa presyo ng kerosene.

Noong nakaraang linggo, P0.30 sentimos ang nadagdag sa halaga ng gasolina, samantalang P0.90 naman sa diesel at kerosene.

Ang paggalaw sa mga presyo ay bunga ng halaga ng langis sa pandaigdigang-pamilihan.

Ang pagtaas ay magsisimula mamayang alas-12:01 ng hatinggabi sa ilang gasolinahan, samantalang karamihan ay bukas ng ala-6 ng umaga gagalawin ang mga presyo ng kanilang gasolina at krudo.