Matapos isapubliko ang alegasyon ng korapsyon sa Land Transportation Franchising and Regulatory Board (LTFRB), inamin ni dating executive assistant Jefferson Tumbado na wala siyang ebidensiya para patunayan ang mga naunang pagbubunyag.
Ginawa ni Tumbado ang pag-amin sa pagdinig na ipinatawag sa Kamara base sa kanyang mga naging pagbubunyag.
Nagresulta pa ang mga pahayag ni Tumbado sa suspensyon ni LTFRB chairman Teofilo Guadiz III.
Nagsilbing resource person sa pagdinig ng House Committee on Transportation si Tumbado gayundin si Guadiz.
Nang aminin ni Tumbado na opinyon niya lamang na may korapsyon sa LTFRB at wala siyang ebidensiya, napagsabihan na siya ni Parañaque City 2nd District Rep. Gus Tambunting.
“Magbibigay kayo ng opinyon niyo na walang pruweba? Sinayang ninyo ang mga oras ng kongresista. Pumasok kami dito kahit na break namin at ngayon sasabihin niyo, opinyon niyo lang?” ang may pagka-inis na sinabi ni Tambunting.
Idinagdag pa ni Tumbado na ang kanyang alegasyon ay base sa mga nakarating sa kanyang reklamo ng transport operators.