Isang aksidente ang banggaan ng bangka ng mga Filipinong mangingisda at dayuhang crude tanker sa Pangasinan na ikinasawi ng tatlo katao.
Sa Bagong Pilipinas Ngayon Public Briefing, sinabi ni Philippine Coast Guard for the West Philippine Sea spokesman Commodore Jay Tarriela na base sa inisyal na imbestigasyon, hindi sinadya ang banggaan.
Wala aniyang intensyon ang dayuhang tanker na banggain ang bangka ng mga Filipinong mangingisda.
Tumutugma aniya ito sa mga testimonya ng nakaligtas na mga mangingisda na nang nangyari ang insidente ay masyadong madilim ang bahagi ng karagatan kung saan naroon ang kanilang mother board, masama ang lagay ng panahon kaya may posibilidad na hindi nga sila napansin ng malaking barko.
Una rito ay nilinaw na ng PCG na walang kinalaman ang China sa nangyaring aksidente at malayo sa Bajo de Masinloc ang pangyayari kundi mas malapit sa bahagi ng Pangasinan.
Sinabi pa ni Tarriela na lumalabas din sa kanilang mga data na isang nautical highway ang bahagi ng karagatan kung saan nangangawil o naglagay ng payao ang mga mangingisda.
Ibig sabihin, sadyang daanan ng marami at malalaking barko ang lugar.
Dahil dito, sinabi ni Tarriela na para sa mga susunod na hakbang, imumungkahi nila na huwag mangisda o maglagay ng payao sa mga lugar na nagsisilbing nautical highway ng mga barko.