Napupusuang maging AFP spokesman, ‘mistah’ ng incoming PNP Chief
Kandidato bilang tagapagsalita ng incoming Armed Forces of the Philippines o AFP Chief-of-Staff ang isang ‘mistah’ o ka-klase ni Incoming Philippine National Police o PNP Chief Ronald ‘Bato’ dela Rosa.
Kinumpirma ni Lt. General Ricardo Visaya, incoming AFP chief, na kinukunsidera niya bilang kanyang spokesperson si Colonel Ferozaldo Paul Regencia.
Si Visaya ay nakatakdang magsimula sa kanyang tungkulin bilang pinuno ng Sandatahang Lakas sa July 01, 2016.
Ani Visaya, taglay ni Regencia ang mga credential at abilidad para maging overall military spokesman.
Sakaling maitalaga si Regencia, papalitan nito bilang AFP spokesman si Brigadier General Resituto Padilla.
Si Regencia, na isang senior officer mula sa Army 9th Infantry Division, ay miyembro ng Philippine Military Academy o PMA ‘Sinagtala’ Class 1986.
Napamunuan na rin noon ni Regencia ang Civil Military Operations Battalion of the National Capital Region, na hinawakan din noon ni Visaya.
Kilala rin si Regencia bilang isa sa senior officers na napagkalooban ng Military Merit Medal, bukod pa sa nanguna siya sa security operations noong pagbisita ni Pope Francis sa Pilipinas noong January 2015.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.