Makalipas ang dalawang linggo simula nang mapatay ng mga pulis ang isang 17-anyos na binatilyo, inalis sa puwesto ang hepe ng pulisya ng Navotas City.
Paliwanag ni Northern Police District (NPD) director, Brig. Gen. Rizalito Gapas kailangan na maalis sa posisyon si Col. Allan Umipig dahil sa kabiguan nito na maayos na masubaybayan ang operasyon na humantong sa pagkamatay ni Jemboy Baltazar.
Dagdag pa ni Gapas, ang hakbang ay alinsunod na rin sa “command responsibility” policy at upang maharap niya ang mga maaring kaso na isasampa laban sa kanya.
May 22 pulis-Navotas ang inalis sa puwesto, kasama na ang anim na itinuturong nakapatay kay Baltazar noong Agosto 2, gayundin ang imbestigador ng kaso. Nahaharap na sila sa mga kasong kriminal at administratibo.
Napatay ang binatilyo matapos mapagkamalang sangkot sa isang kaso ng pagpatay sa lungsod.