Hindi pa nagbabago ang plano na pagtataas ng buwis sa susunod na taon.
Ito ang ibinahagi ni Finance Sec. Benjamin Diokno sa 2024 national budget briefing ng Development Budget Coordination Commitee sa Senado.
Ayon kay Diokno patuloy silang makikipagtulungan sa Kongreso para sa kinakakailangan paniningil ng karagdagang buwis para na rin sa mabilis na paglago ng ekonomiya ng bansa sa pamamagitan ng mga kinakailangang reporma.
Sabi pa ng kalihim, kabilang dito ang pagpapasa ng mga natitirang tax reform packages ng nakaraang administrasyon at mga bagong tax measures sa ilalim ng kasalukuyang Marcos administration.
Ang mga itutulak na dagdag na buwis ay ang mga sumusunod ; – Package 4 o ang Passive Income and Financial Intermediary Taxation
– Excise tax sa single-use plastic
– Rationalization of mining fiscal regime
– Motor vehicle road users tax
– Excise tax para sa matatamis na inumin at junkfoods
– Buwis sa pre-mixed alcohol
– VAT sa digital service providers
Target na maaprubahan ngayong 19th Congress ang pitong panukala para sa mga nabanggit na dagdag na buwis bilang suporta sa medium-term fiscal framework.
Pagbabahagi din ni Diokno na kapag naipatupad ang mga tax measures na ito ay makakalikom ang gobyerno ng P120.5 billion na dagdag sa kita para sa taong 2024.
Pag nagtuluy-tuloy ay tataas pa aniya ang makokolektang buwis dito sa P152.2 billion sa 2025 at P183.2 billion sa 2026.