Belmonte payag sa emergency powers kontra sa trapik sa Metro Manila
Pabor si outgoing House Speaker Feliciano Belmonte Jr. sa mga panukala na bigyan ng emergency powers si President-elect Rodrigo Duterte upang maresolba ang problema sa matinding daloy ng trapiko sa Metro Manila.
Sa ambush interview kay Belmonte, sinabi nito na maraming lohikal na hakbang na pwedeng gawin para maibsan ang malawakang trapiko, partikular sa Kalakhang Maynila.
Subalit inamin ni Belmonte kailangan na talaga ng Pangulo ang emergency powers dahil masyado nang mabigat ang epektong idinudulot ng traffic mess, gaya ng pagkawala ng mahigit P2 Billion sa bansa sa kada araw.
Aprub din sa pinuno ng Kamara na maipaloob sa emergency powers ang pagsuspinde ng proseso ng bidding para sa infrastructure projects sa Metro Manila.
Gayunman, sinabi ni Belmonte na kailangang lantad sa publiko ang anumang transaksiyon.
Ipinaalala rin ni Belmonte na dapat maging malinaw kung para saan at ano ang sakop ng emergency powers na ipagkakaloob kay Duterte.
Si Belmonte ay siyang nanguna sa pagbubukas ng House of Representatives Legislative Library, Archives and Museum building at Wall of Honor na kapwa nasa loob ng Batasan Pambansa complex.
Dumalo rin sa okasyon sina House Secretary General Marilyn Barua-Yap, Reps. Winston Castelo at Leandro Madrona, maging ang mga bagong Kongresista ng 17th Congress.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.