SIM card registration, pinalawig ng 90 araw

 

Pinalawig pa ng Department of Information and Communications and Technology ng 90 araw ang deadline ng SIM card registration.

Ito ay matapos ang pakikipagpulong ng mga opisyal ng DICT at Justice Secretary Crispin Remulla kay Pangulong Ferdinand “Bongbong” Marcos Jr. ngayong araw sa Palasyo ng Malakanyang.

Ayon kay Remulla, palalawigin ang deadline  para mabigyan ng pagkakataon ang publiko na mairehistro ang SIM card.

Bukas, Abril 26 sana ang deadline ng SIM card registration.

Una rito, sinabi ni Remulla na babantayan ng pamahalaan ang mga kompanya ng telekomunikasyon para masiguro na hindi sasamantalahin ang SIM card registration.