Wala pang kumpirmasyon ang Civil Aviation Authorities of the Philippines (CAAP) na ang sinasabing eroplano sa gilid ng Mayon Volcono ay ang nawawalang Cessna plane sa Albay.
Paliwanag ni CAAP spokesman Eric Apolonio dapat ay makita ng kanilang accident investigators ang sinasabing crash site.
“Aerial photos lang po yung nakuha namin — yung drone shots — but we cannot confirm if yun nga yung said aircraft. Kailangan po kasi yung ating accident investigators, makita ho sa ground yung crash site mismo,” aniya.
Unang inanunsiyo ng mga lokal na opisyal ang pagkakatagpo sa nawawalang Cessna 340A, 32 oras makalipas itong ideklara na nawawala, gayundin ang apat na sakay nito.
Dagdag pa ni Apolonio kinakailangan na masuri din ng kanilang mga imbestigador ang mga bahagi ng eroplano bago kumpirmahin at ideklara na ang nakita sa may Anoling Gulley ng Mayon Volcano sa Barangay Quirangay sa bayan ng Camalig ay ang nawawalang eroplano.
Kahapon, sinimulan na ng grupo ng mountaineers ang pag-akyat sa bulkan para sa rescue mission.