Aabot sa 1,571 ektaryang lupa ang ipinamahagi ng Department of Agrarian Reform sa 1,006 agrarian reform beneficiaries sa Eastern Visayas.
Mismong sina Senador Imee Marcos at DAR Secretary Conrado Estrella III ang namahagi ng 1,047 land titles sa mga benepisyaryo mula sa anim na probinsya sa Eastern Visayas.
Isa sa mga nakinabang si Elvira dela Pena Hallazgo mula sa Brgy. Gibacungan, Tabango, Leyte.
“Taos-puso kaming nagpapasalamat sa DAR para sa mga titulo ng lupa upang kami ay maging opisyal na magmay-ari ng lupang aming binubungkal sa loob ng matagal na panahon,” pahayag ni dela Pena.
Sinabi naman ni Marcos na marami sa mga magsasaka ang naghintay ng ilang dekada bago nakuha ang titulo.
Nanawagan pa ang Senador para sa modernisasyon ng mga sakahan upang mapalakas ang produksyon ng pagkain sa rehiyon.
“Kailangan nating pagbutihin ang ating programa sa mekanisasyon at bigyan ang ating mga magsasaka ng mga kinakailangang gamit tulad ng pataba at mga hybrid na binhi,” ayon kay Marcos.
Sinabi ni Estrella na patuloy na ilalapit ng DAR ang pamahalaan sa mga tao at ipararamdam sa mga ARB na ang kanyang ahensya ay laging handa para tulungan sila.
“Huwag po ninyong ibenta ang inyong mga lupain. Lahat ng suportang serbisyo ay ipagkakaloob sa inyo ng ating mahal na Pangulong Ferdinand R. Marcos Jr. Gawin ninyong mas produktibo at panatilihin ang mga iginawad sa inyong mga lupain upang kayo ay maging self-reliant food producers ng bansa,” ani Estrella.