Niliinaw ng Civil Aviation Authority of the Philippines (CAAP) na ang nangyaring malaking aberya sa operasyon ng Ninoy Aquino International Airport (NAIA) noong unang araw ng bagong taon ay hindi maiuugnay sa anumang ‘cybercrime.’
Ayon sa Department of Transportation (DOTr), naabisuhan na ng CAAP ang Department of National Defense ukol sa kanilang posisyon na hindi maaring manipula mula sa ‘labas; ang nagka-aberyang kagamitan.
Gayunpaman, magsasagawa pa rin ng pagsusuri ang ‘cyber security experts.’
Kahapon, nagpaliwanag ang CAAP sa ilang miyembro ng gabinete hinggil sa nangyaring ‘glitch’ at napagkasunduan na may pangangailangan para sa ‘upgrading’ ng mga gamit ng ahensiya.
Nagpahayag na si Information and Communications Sec. Ivan Uy na suportahan ang CAAP sa isasagawang ‘system upgrade.’
Sinabi naman ni National Security Adviser Clarita Carlos na dapat ay ideklara na mahalaga sa pambansang seguridad ang mga kagamitan ng CAAP.