Naghinala na ang mga tauhan ng Bureau of Jail Management and Penology (BJMP) sa basketball shoes na ipinabibigay sa isang detenido sa Metro Manila District Jail sa Taguig City.
Base sa ulat, nagpanggap na dalaw ang 24-anyos na si Jeremiah Neil Buenaventura, ng Mandaluyong City at ipinabibigay ang isang pares ng basketball shoes.
Dahil sa pagdududa sa basketball shoes para sa isang detenido, masusing ininspeksyon ang sapatos at nabuking ang hinihinalang shabu na isiningit sa suwelas.
Sinabi ni Taguig City police chief, Lt. Col. Robert Baesa, nagkakahalaga ng P170,000 ang nakumpiskang droga.
Hindi na tinukoy ang detenido na tatanggap ng sapatos at tumanggi na rin si Buenaventura na magbigay pa ng detalye.
Kakasuhan siya ng paglabag sa Comprehensive Dangerous Drugs Act of 2002.