Remittance firm na sangkot sa $81-M money laundering scam, tinanggalan ng lisensya
Kinansela ng Bangko Sentral ng Pilipinas (BSP) ang lisensya ng Philrem Services Corp. at dalawa pang kumpanya na nadawit sa kontrobersyal na 81 milyong dolyar na money laundering scam noong February.
Sa statement, sinabi ng BSP na ibinasura na ng Monetary Board ang mga certificates of registration ng Philrem ng mag-asawang Michael at Salud Bautista, Werquick at Peso Remittance Express Inc. bilang mga foreign exchange dealer at remittance agent sa bansa.
Ang kanselasyon ay bunsod ng paglabag ng tatlong kumpanya sa Manual of Regulations for non-bank financial institutions.
Nangako rin ang BSP na makikipagtulungan sa iba pang mga law enforcement agencies kaugnay sa isinasagawang imbestigasyon kaugnay sa multi-milyong dolyar na transaksyon.
Hahabulin na rin anila ng Monetary Board ang iba pang mga opisyal ng mga naturang kumpanya at mga board of director at officers ng mga ito.
Matatandaang una nang kinasuhan ang mag-asawang Salud ng Anti-Money Laundering Council (AMLC) dahil sa partisipasyon sa iligal na paglilipat ng $81-M na ninakaw ng mga hackers mula sa New York Federal Reserve account ng Bank of Bangladesh.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.