Tiniyak ni Vice President at Education Secretary Sara Duterte na handa na ang Department of Education (DepEd) sa pagsisimula ng School Year 2022 – 2023 sa darating na Agosto 22.
Sinabi ito ni Duterte nang pangunahan niya ang pagsisimula ng Brigada Eskwela sa Imus Pilot Elementary School sa Cavite, Lunes ng umaga (Agosto 1).
Pag-amin naman nito na sa kanilang paghahanda ay maaring magdulot ng magkahalong kasabikan at pangamba sa mga guro, magulang at mag-aaral.
Aniya, nananatili ang pandemya dala ng COVID-19, na sinundan pa ng monkeypox at ang nakalipas na malakas na lindol na yumanig sa malaking bahagi ng Luzon.
“What is important is that we have the determination to succeed in our mission,” aniya.
Ngunit aniya, buo ang kanyang tiwala na anumang hamon ang kaharapin ay malalagpasan ito ng DepEd.
Una na rin inanunsiyo ni Duterte na sa darating na Nobyembre ay nais niyang 100 porsiyento na ang in-person classes.
Sa pagsisimula naman ng klase, patuloy ang pagkasa ng blended learning system bagama’t magpapatuloy pa rin ang limitadong face-to-face classes.