20 senador ang bumotong pabor na maging susunod na pinuno ng Mataas na Kapulungan ng Kongreso si Zubiri.
Isinagawa ang pagboto kay Zubiri sa unang sesyon ng Senado, bago ang unang State of the Nation Address (SONA) ni Pangulong Ferdinand “Bongbong” Marcos, Jr., Lunes ng umaga (Hulyo 25).
Walang ibang senador na na-nominate sa naturang posisyon.
Nag-abstain naman sa pagboto sina Senators Risa Hontiveros at Aquilino “Koko” Pimentel III. Gayunman, nagparating pa rin sila ng pagbati kay Zubiri.
Inihayag naman ng magkapatid na sina Senators Alan Peter at Pia Cayetano na hindi sila nakiisa sa eleksyon ng Senate president at mananatili silang bahagi ng ‘independent’ bloc ng Senado.
Samantala, bilang bagong Senate President, sinabi ni Zubiri na sisiguraduhin niya na magkakaroon ng produktibo at epektibong Senado na tutugon sa mga pangangailangan ng bawat Pilipino.
“And as SP, I will do my utmost best to uphold the dignity, integrity, and independence of the Senate. We have 24 senators, 24 voices, 24 votes—pantay-pantay po kami diyan,” pahayag ni Zubiri.
Dagdag nito, “Lahat ng senador ay magkakaroon ng espasyo para magsulong ng kanilang mga panukala at magpahayag ng kanilang mga opinyon. I will make sure of it.”