Hinihimok ng Malacañang ang lahat ng mga Pilipino na i-display ang watawat ng Pilipinas sa lahat ng mga opisina, ahensya, business establishments, paaralan at maging mga pribadong tahanan mula May 28 hanggang June 12.
Ito ay bilang pag-gunita sa Flag Days na idineklara noon ni dating Pangulong Fidel V. Ramos.
May 28, 1898 unang i-winagayway ang watawat ng Pilipinas nang matalo ng mga sundalong rebolusyonaryo ang pwersa ng mga Kastila sa Battle of Alapan sa Imus Cavite.
Gayunman, sa araw na iyon, hindi pa pormal na isinasapubliko ang pag-anunsyo ng pambansang watawat, at una itong pormal na isinapubliko noong June 12, 1898.
Mula 1919 hanggang 1940, tuwing Oktubre ito ginugunita, ngunit mula 1941, ginawa na itong June 12 kung kailan ito unang ibinandera sa Kawit.
Sa proklamasyon naman ni dating Pangulong Diosdado Macapagal, ibinalik sa May 28 ang National Flag Day.
Noong May 23, 1994, naglabas ng executive order si Ramos na nagpahaba sa National Day mula May 28 hanggang June 12 na sinusunod pa rin hanggang sa ngayon.