Gov. Garcia, binigyan ng DILG ng hanggang Hunyo 22 para ayusin ang kautusan ukol sa pagsusuot ng face mask

Binibigyan ng taning ng Department of the Interior and Local Government (DILG) ng hanggang sa araw ng Martes, Hunyo 21, o Miyerkules, Hunto 22, na ayusin ni Cebu Governor Gwen Garcia ang kautusan na gawing optional na lamang ang pagsusuot ng face mask bilang proteksyon laban sa COVID-19.

Sa Laging Handa Public Briefing, sinabi ni DILG Undersecretary Martin Diño na may katapat na parusa sa mga lalabag sa kautusan ng national government.

Ayon kay Diño, ipinauubaya na ng DILG sa Palasyo ng Malakanyang ang pagpapasya kung pa patawan ng parusa si Garcia.

Ayon kay Diño, sumusunod ang DILG sa batas na ginawa ng Kamara at Senado na Bayanihan Act na panlaban sa COVID-19.

Una nang binalaan ng DILG si Garcia na ayusin ang ipinalabas na kautusan hanggang sa weekend.

Sa ngayon, sinabi ni Diño na wala namang barangay ang sumusunod na gawing optional ang pagsusuot ng face mask.