Duterte-administration sinisingil sa P500 kada buwan ayuda sa masa

Dahil sa inaasahan na pagtaas pa ng halaga ng mga bilihin at serbisyo, umapila si Albay Representative Joey Salceda (2^nd District) sa gobyerno madaliin ang pamamahagi ng mga subsidiya sa mga mahihirap na pamilya sa bansa.

Partikular na tinukoy ni Salceda ang P500 kada buwan na subsidiya na ipinangako ni Pangulong Duterte sa mga mahihirap na pamilya sa loob ng tatlong buwan.

Aniya nagbabala na ang Department of Energy (DOE) sa posibleng pagtaas muli ng presyo ng mga produktong-petrolyo at gayundin sa tinapay at isda sa mga susunod buwan.

Ibinahagi naman ng mambabatas na may natanggap siyang impormasyon na sa susunod na linggo ay magsisimula na ang pamamahagi ng P500 ayuda.

“The funding is there, for at least a few months. I also requested that any unreleased subsidies be granted already. Malaking tulong po ‘yan,” sabi pa ni Salceda.