Tutukan ni incoming Information and Communication Technology Secretary Ivan John Uy ang digital connectivity sa bansa.
Sa Laging Handa Public Briefing, sinabi ni Uy na mayroong marching order si incoming President Ferdinand “Bongbong” Marcos Jr. na tutukan ang digital connectivity lalo na sa mga liblib na lugar sa ibat-ibang bahagi ng bansa.
Sa ganitong paraan kasi aniya, mabibigyan ng access ang publiko lalo na ang mga lugar na hindi kayang abutin ng internet.
“Alam ninyo po ang Pilipinas ay archipelago at napakaraming mga isla, wala pang access to the world wide web, at ito po ay dapat i-prioritize po natin. So, that’s one of the marching orders po,” pahayag ni Uy.
Pinatutukan din aniya ni Marcos ang e-governance sa bansa.
“Ito po ay upang mapasimple ang mga transaksyon ng ating mga mamamayan sa mga access to government services. So we are looking at streamlining, reducing red tape and minimizing iyong mga pila-pila po sa mga iba-ibang opisina ng gobyerno, mag-a-absent sa trabaho upang makakuha lang ng certification, ng clearance or gagawa ng mga applications sa government offices,” pahayag ni Uy.