Nakaposas ang kamay nya sa harapan, guwardyado ng mga US Military at mga miyembro ng Philippine National Police Special Action Force (PNP SAF).
Naunang pumasok kay Pemberton ang apat na US servicemen na pawang hostile witness ng prosekusyon sa pagpapatuloy ng hearing ngayong araw.
Kahapon humarap sa witness stand ang mediko legal na si Police Sr. Insp. Reynaldo Dave na syang nag-autopsy sa bangkay ni Jennifer Laude.
Kasabay ng hearing sa Olongapo City ngayon ng kaso laban kay Pemberton ay ang puspusang kampanya ng mga residente ng lungsod sa mas pinalakas na presensiya ng US military sa bansa.
Ayon sa isang residente, ”Ang kasalanan ng isang Amerikano ay hindi kasalanan ng lahat. Kailangan natin ang mga Amerikano.”
Samantala, ilang grupo naman na nagpahayag ng suporta sa Estados Unidos ang nag-picket kanina sa harapan ng gusali ng korte bago magsimula ang pagdinig. /Erwin Aguilon