Kabiguan ng BIR sa P200-B utang sa buwis ng Marcoses sisilipin sa Senado
Nais ni Senator Koko Pimentel na malaman ang dahilan nang diumanoy kabiguan ng Bureau of Internal Revenue (BIR) na kolektahin ang utang sa estate tax ng pamilya Marcos.
Inihain ni Pimentel ang Senate Resolution No. 998 para alamin kung may naging pagkukulang ang mga dati at kasalukuyang opisyal ng BIR kayat hindi nasingil ang pamilya Marcos sa kanilang utang na estate tax na lumubo na sa higit P200 bilyon.
Katuwiran nito, ang masisingil sa pamilya Marcos ay malaki ang maitutulong sa gobyerno sa pagtugon sa mga pangangailangan sa nagpapatuloy na pandemya dulot ng COVID 19, gayundin sa epekto ng digmaang Ukraine – Russia.
“The Filipino people are presently suffering from the effects of the recession due the COVID 19 pandemic as well as the ongoing effects of the Russian-Ukraine war which have led to gargantuan fuel price increases almost overnight and in turn, to great increases in the prices of basic commodities, transportation and services,” pangangatuwiran pa ni Pimentel.
Aniya walang malinaw na paghuhugutan ng pondo ang gobyerno para may maipangtulong sa mga mamamayan.
Una naman ng sinabi ni Sen. Imee Marcos na maging sila sa kanilang pamilya ay naguguluhan na sa sinasabing utang nilang estate tax.
Kinuwestiyon din nito ang ‘timing’ ng pagbuhay sa isyu ng utang ng kanilang pamilya dahil tumatakbo sa pagka-pangulo ang kanyang kapatid, si dating Sen. Bongbong Marcos Jr.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.