Itinuro ni independent presidential aspirant Ping Lacson ang mga tiwaling opisyal ng gobyerno na dapat sisihin kung namamayagpag ang katiwalian sa bansa.
Ito ang isinagot ni Lacson sa second round ng ‘PiliPinas Debates 2022: The Turning Point’ ng Commission on Elections (Comelec) kagabi.
“Hindi po mahina ang sistema. Marami tayong mga batas, mga institusyon na tumatakbo. Kahinaan po ng tao, kahinaan ng tao sa gobyerno,” aniya.
Binanggit nito ang Anti-Red Tape Act (Ease of Doing Business Act), Government Procurement Reform Act at Philippine Competition Act, na ilan lamang sa mga batas na ipinasa para iwasto ang sistema.
Dagdag pa ni Lacson, may Sandiganbayan na dumidinig sa mga kaso ng korapsyon at may Office of the Ombudsman na nag-iimbestiga at nagsasakdal ang mga naakusahang opisyal ng gobyerno.
“So ang kahinaan, hindi po sa sistema kundi sa tao na nagpapatupad ng Anti-Graft and Corrupt Practices Act,” pagdidiin pa nito.