Pinahihinahon ng National Food Authority ang publiko sa posibilidad ng pagkalat ng synthetic rice o pekeng bigas.
Sa panayam ng Radyo Inquirer, sinabi ni NFA Administrator Renan Dalisay na isolated case lamang ang nakitang pekeng bigas sa isang tindahan sa Davao.
Ayon kay Dalisay, makalipas ang labinganim na araw na inspeksiyon sa mga warehouse sa buong bansa, iisang kaso lamang ang nagpositibo.
Maari aniyang contaminated lamang ang bigas dahil sa mishandling o hindi kaya ay may gustong manabotahe lamang.
“Walang dapat na ipangamba ang publiko, hindi dapat mag-panic o alarma, pero dapat pa rin na maging vigilant ang publiko,” pahayag ni Dalisay.
Dagdag ni Dalisay, kung mayroon mang positibong naidulot ang pagkalat ng balitang pekeng bigas, ito ay naging alerto at naging mapagmatyag ang publiko. “Maganda ang issue na ito dahil nagkaroon ng consciousness ang publiko,” pagtatapos ni Dalisay./Chona Yu