Inilunsad ang “Sara para sa Barangay” initiative upang maabot sa grassroot level ang mga programa nina Lakas-Christian Muslim Democrats (CMD) vice presidential aspirant at Davao City Mayor Sara Duterte kasama si Partido Federal ng Pilipinas (PFP) presidential aspirant Ferdinand “Bongbong” Marcos, Jr.
Ipinaalam ng ilang opisyal ng gobyerno ang konsepto ng naturang inisyatibo, kung saan maipaglalaban ang interes ng mga indibiduwal sa barangay level, lalo na pagdating sa aspeto ng edukasyon, kalusugan, trabaho, at negosyo.
Kabilang dito sina Vice Governor Maricar Zamora, Rep. Manuel “Way Kurat” Zamora, Davao de Oro Gov. Jayvee Tyron Uy, ilang alkalde, bokal, konsehal, at iba pang community leaders.
“Mayor Sara will champion the interest of grassroots folk in this historic initiative,” saad ni Zamora sa isang event sa Octa-M Farm sa Monkayo, Davao de Oro.
Binati naman ni House Deputy Speaker at Surigao del Sur Rep. Prospero “Butch” Pichay, Jr. ang mga lokal na opisyal at organizers ng event na sumusuporta kay Duterte.
Ani Pichay, “Nandiyan ang malaking puso ni Mayor Sara para sa barangays, hindi lamang sa mayor, gobernador, at bise-gobernador. Kung ano ang problema sa mga barangay, kinailangang bigyan ng malaking tulong at gagawin iyan ni Mayor Sara.”
Kasabay nito, idineklara ang pagsuporta sa vice presidential bid ni Mayor Sara at ang UniTeam Alliance, sa pangunguna ni Marcos.