Labis na nabahala si Senator Grace Poe sa pagkalagas ng mga trabaho sa mga kumpanyang nasa sektor ng telecommunications at broadcast bunga ng nag-expire na ang prangkisa.
Marami din aniya ang nawalan ng trabaho dahil sa pagpapalabas ng cease and desist orders (CDOs) ng National Telecommunications Commission (NTC).
“Walang may gustong mawalan ng trabaho lalo na sa panahon ngayon. Napakabigat na hamon sa isang kumpanyang sikaping makaraos habang hindi naman ito maaaring mag-operate,” ayon sa namumuno sa Senate Committee on Public Services.
Ang pagpapalabas ng CDOs ng NTC ay nagsimula nang magdesisyon ang Korte Suprema na hindi maaring mag-operate ang mga telcos at broadcasting companies ng walang prangkisa.
Magugunita na ito ang sinapit ng kaso ng ABS-CBN, na naisyuhan ng NTC ng CDO dahil sa expired na prangkisa.“Nakakatakot talaga ito. Dahil dito, marami ngayon ang naaapektuhan. Marami ang nawalan at mawawalan pa ng trabaho,” sabi ni Poe.
Sa pagdinig ng naturang komite kamakailan, sinabi ng NTC na sinusuportahan nila ang Senate Bill No. 1530 ni Senate Minority Leader Frank Drilon na layong maging malinaw kung ang hindi pa pagbibigay ng prangkisa ay maituturing na pinagkakaitan na sila.