Nasamsam ng Bureau of Customs -Port of Manila (BOC-POM), sa pamamagitan ng kanilang Customs Intelligence and Investigation Service Field Office (CIIS) at Enforcement and Security Service seized (ESS), ang mga smuggled na kagamitan, Chinese na pagkain at inumin, at medical protective masks.
Ayon sa ahensya, tinatayang nagkakahalaga ang mga kontrabando ng P500 hanggang P600 milyon.
Sa bisa ng Letter of Authority (LOA) na inilabas ni BOC Commissioner Rey Leonardo Guerrero, nag-inspeksyon ang mga miyembro ng POM-CIIS, POM-ESS, Philippine Coast Guard, at National Bureau of Investigation (NBI) sa isang warehouse sa bahagi ng 9172 Antero Soriano Hi-Way sa Barangay Mulawin sa Tanza, Cavite.
Nagresulta ang inspeksyon sa pagkakadiskubre ng mga pekeng kagamitan na may tatak na Jordan, Nike, Crocs, Havaianas at iba pa.
Natagpuan din ang iba’t ibang Chinese food, Chinese beverages tulad ng beers, iced teas, at sodas, at medical protective masks na ipinamamahagi ng grupo ng mga Chinese national, sa pamumuno nina Anna Ty at Willy Zhang.
Magsasagawa ng mas malalim na imbestigasyon sa naturang warehouse dahil sa posibleng paglabag sa Section 1114 ng Republic Act 10863 o Customs Modernization and Tariff Act (CMTA).