Ilang araw bago ang halalan, isa na namang paaralan ang pinasabugan ng mga hindi pa nakikilalang suspek sa lalawigan ng Maguindanao.
Ayon kay Sr. Insp. Esmael Madin, hepe ng Sultan Kudarat, isang rifle grenade ang pinasabog ng mga suspek sa Sandakan daycare center sa Barangay Dalumangcob.
Ang naturang daycare center ay isa sa mga gagamitin sana bilang polling precinct sa araw ng eleksyon sa May 9.
Ayon kay Madin, kanilang itinuturing na election-related ang insidente bagamat patuloy pa ang kanilang pagkalap ng karagdagang impormasyon.
Dahil sa pinakahuling insdentte, ilang mga guro na magisisilbi sana bilang Board of Election Inspectors ang nangangamba at nagdadalawang-isip nang magsilbi sa araw ng halalan.
Ang pinakahuling insidente ay ikawalo na sa serye ng pagpapasabog sa mga paaralan sa lalawigan ng Maguindanao.
Noong nakaraang linggo lamang, pitong paaralan ang pinasabugan din at sinunog pa ng mga armadong kalalakihan sa bayan ng Sultan Mastura na katabi lamang ng bayan ng Sultan Kudarat.