Muling susubukan ni dating Senator JV Ejercito na makabalik sa Senado sa 2022 elections.
Ayon kay Ejercito hiningi at ibinigay na sa kanya ng amang si dating Pangulong Joseph Estrada ang basbas nito sa kanyang muling pagtakbo sa pagka-senador.
Aniya tatakbo siya sa ilalim ng Nationalist People’s Coalition at sabi ni Ejercito ang tatlong nagdeklara na ng kandidatura sa pagka-pangulo – Senators Ping Lacson at Manny Pacquiao at Manila Mayor Isko Domagoso, ay pawang kaibigan niya.
Sinabi pa ng dating senador na hindi niya alam kung ang half-brother niyang si dating Senator Jinggoy Estrada ay kakandidato din muli sa pagka-senador.
Magugunita na sabay na kumandidato ang dalawa noong 2019 senatorial race at kapwa natalo din.
Diin ni Ejercito pakiramdam niya ay kailangan siyang makabalik sa Senado para mapagtibay pa ang Universal Health Care Law, gayundin ang iba pa niyang naiwan na mahahalagang panukala.