Pagbili ng ‘readily available’ na face masks, face shield salig sa probisyon ng Bayanihan 1
Iginiit ni Deputy Speaker Rodante Marcoleta na batay sa probisyon ng Bayanihan 1 ang pagbili ng Procurement Service ng Department of Budget and Management (PS-DBM) sa mga available na face shield at face mask.
Sa pagdinig ng House Committee on Good Government and Public Accountability, naitanong ni Marcoleta si dating Budget Undersecretary Lloyd Christopher Lao kung alin sa dalawang supplier ang pipiliin, ang ‘supplier A’ na P1 ang presyo ng surgical mask pero wala pang produkto o ‘supplier B’ na P100 kada unit ang presyo at nakahanda na ang produkto.
Tugon ni Lao, pipiliin niyang bilihin ang item na available na kung pagbabasehan ang “judgement call”.
Dahil sa kakulangan ng suplay noong bago pa pandemya, legal ang ginawang desisyon ng PS-DBM na “emergency procurement” ng face masks at face shields kaya hindi rin matibay ang argumento na may iregularidad sa pagbili nito.
Sinuportahan naman ito ni dating PS-DBM Director Warren Liong na pinakamahalaga sa “emergency procurement” ang agad na mabili at mai-deliver ang mga medical supply.
Ipinakita pa ni Liong na nakasaad sa Bayanihan 1 na may ilang exemption sa pagbili sakaling kailanganin, kasama rito ang eligibility component tulad ng pagsusumite ng mayor’s permit, income tax return (ITR) at sapat na basehan ang verbal agreement para makapag-award ng kontrata.
Aabot sa P1.82 bilyon ang halaga ng binili ng PS-DBM kung saan nagkakahalaga ng P27.72 ang bawat isang face mask habang P120 naman ang bawat isang face shield.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.