DepEd tiniyak ang kalidad ng self-learning modules para sa SY 2021 – 2022
Siniguro ng Department of Education (DepEd) na pinagbuti at de-kalidad na ang self-learning modules para sa higit 26 milyong mag-aaral ngayon School Year 2021 – 2022.
“Marami tayong adjustments at talaga pong ang purpose natin ay mas maging mabuti ang kalidad ng mga self-learning materials,” ayon kay Undersecretary for Curriculum and Instruction Diosdado San Antonio.
Ibinahagi ni San Antonio na pinagbuti na ang quality assurance process sa modules simula pa noong Enero, bukod pa sa nakipag-ugnayan sila sa Philippine Normal University para masuri ang mga materyales.
“At ang ginawa po nating paraan para masiguro na better version ng self-learning modules ang gagawin ng mga bata, nagsagawa po tayo ng 2nd round ng quality assurance sa mga self-learning modules na ito at pumapayag pa rin po tayo ng combination ng Central office and locally-quality assured na learning materials,” dagdag pa ng opisyal.
Dagdag pa nito, bumaba na ng husto ang bilang ng mga naiulat na mga mali sa modules simula noong Enero hanggang nitong Hulyo, kumpara sa higit 100 mali na nakumpirma noong Oktubre hanggang Disyembre.
Pagtitiyak naman ni Education Sec. Leonor Briones natuto na silang mag-adjust sa ‘new normal education’ at hindi na mauulit ang mga nangyari sa nakalipas na school year.
“I’d like to assure everyone that this will not be a repeat of last year because events don’t necessarily repeat themselves,” sabi ng kalihim.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.