Naghain ng reklamo sa National Bureau of Investigation ang isang netizen makaraan itong makatanggap ng katakut-takot na ‘hate messages’ makaraan niyang batikusin sa social media si Davao City Mayor Rodrigo Duterte.
Mga kasong grave threats, paglabag sa Cybercrime Prevention Act at iba pang kaso na may kinalaman sa Omnibus Election Code ang inihaing reklamo ni Renee Karunungan sa ilang mga sinasabing Duterte supporters na ‘nam-bully ‘ umano sa kanya sa social media.
Una rito, nag-post ng komento si Karunungan sa kanyang blog at sa social media kung saan sinabi nitong ‘lazy choice’si Duterte sa hanay ng mga presidentiables.
Kinastigo rin ng blogger si Duterte dahil sa mga extrajudicial crimes na kinasasangkutan umano nito sa lungsod ng Davao.
Dahil sa kanyang mga sinasabi sa blog post, pinutakti na ito ng katakut-takot na ‘hate comments’ mula sa mga netizens na sumusuporta sa alkalde.
Ilan sa mga komento ang humihiling pa na sana ay may mangyaring masama dito at maging sa kanyang pamilya.
Dahil dito, nagpasya na si Karunungan na maghain ng reklamo kontra sa mga nagpo-post ng mga ‘hate messages’ at pambu-bully laban sa kanya.