ITCZ magdadala pa rin ng pag-ulan sa ilang parte ng bansa

Apektado pa rin ng Intertropical Convergence Zone (ITCZ) ang Southern Luzon, Visayas at Mindanao.

Ayon kay PAGASA weather specialist Ana Clauren, magdadala pa rin ang naturang weather system ng kalat-kalat na pag-ulan, pagkidlat at pagkulog sa CALABARZON, MIMAROPA, Bicol region at Western Visayas.

Sa nalalabi namang bahagi ng bansa, kasama ang Metro Manila, may posibilidad na makaranas ng mga panandaliang pag-ulan dulot ng localized thunderstorm.

Aniya, walang inaasahang papasok o mabubuong bagyo sa teritoryo ng bansa sa susunod na dalawa hanggang tatlong araw.