Ipinag-utos ng Technical Education and Skills Development Authority (TESDA) ang pagsuspindi ng face-to-face classes at pagsasagawa ng competency assessment sa mga lugar na nasa ilalim ng enhanced community quarantine (ECQ) at modified ECQ.
Ang memorandum na ipinalabas ni TESDA Secretary Isidro Lapeña ay base sa pag-apruba ni Pangulong Duterte sa rekomendasyon ng IATF na pairalin muli ang ECQ sa Metro Manila simula ngayon araw hanggang Agosto 20.
Sakop ng kautusan maging ang Technical Vocational Institutions (TVIs) na nasa ECQ at MECQ areas.
Magpapatuloy naman ang competency assessment ng Domestic Work NC II na isinasagawa sa TESDA Technical Institutes sa mga lugar na nasa MECQ o mas mababa pa ang quarantine restrictions.
Hinihikayat naman ni Lapeña ang mga apektadong TVIs at Assessment Centers na magsagawa na lang ng online at virtual trainings hanggang maari habang suspindido ang ‘face-to-face’ classes.
Paalala lang din niya sa kanyang regional at provincial directors na tiyakin na nasusunod sa lahat ng TVIs at ACs ang health and safety protocols.