Sa kabila nang pabigat nang pabigat na ang lagay ng trapiko sa Metro Manila, hindi pa rin naiisip ng Metropolitan Manila Development Authority (MMDA) na bawiin ang suspensyon sa number-coding scheme.
Sinabi ni MMDA Chairman Benhur Abalos na ‘manageable’ pa naman ang trapiko sa EDSA bagamat base sa pinakahuling datos ay nalalapit na ang sitwasyon sa Kapaskuhan noong 2019.
Katuwiran ng opisyal maraming dahilan ang dapat ikunsidera bago muling ipatupad ang Unified Vehicular Volume Reduction Program (UVVRP).
Binanggit nito na hindi pa rin nagbabalik sa normal ang sitwasyon ng pampulikong transportasyon dahil limitado pa rin ang bilang ng mga pampublikong sasakyan na bumibiyahe, gayundin nananatili ang 50% capacity limit.
Sinabi pa niya na kung ibabalik ang number coding, malalagay sa kompromiso ang kaligtasan at kalusugan ng mga motorista na babalik sa ‘carpooling.’
Madadagdag din sa mga pumipila para makasakay sa mga pampublikong sasakyan ang hindi na magdadala ng kanilang sariling sasakyan.
Aniya sa kabila nang pagdami na ng sasakyan na bumabagtas sa EDSA, hindi pa rin naman nagbabalik sa pre-pandemic level ang travel time sa pangunahing lansangan.