Hindi kinaya ng mas batang edad ng Gilas Pilipinas ang karanasan ng Serbia, 76-83
Nagawang makipagsabayan ng Gilas hanggang sa unang bahagi ng huling yugto ngunit kinapos sa mga huling minuto ng kanilang paghaharap sa FIBA Olympic Qualifying Tournament sa Belgrade.
Nang makalamang pa ang Gilas sa 4th quarter sumandal na ang world No. 5 Serbia kay Boban Marjanovic, ng Dallas Mavericks, na umiskor ng walong puntos sa huling apat na minute ng laro.
Gumawa si Marjanovic ng 25 puntos para sundan ang kanilang panalo kontra Dominican Republic noong nakaraang araw.
Pinakaba pa ng mga mas batang Gilas ang kanilang kalaban nang dahan-dahan burahin ang 16 puntos na kalamangan na ikinabigla din ng mga Serbian fans na nasa loob ng Aleksandar Nikolic Hall at lumamang pa, 74-73.
Si Gilas naturalized player Angelo Kouame ang bumandera sa Gilas sa kanyang 17 puntos, samantalang nag-ambag sina Jordan Heading at Kai Sotto ng 13 at 10 puntos.
Hindi nakapaglaro si Dwight Ramos, ang leading scorer ng Gilas, dahil sa injury, gayundin para sa Serbia sina Miami Heat forward Nemanja Bjelica at Nikola Kalinic.