Paghingi ng saklolo sa bakuna ng LGUs kay VP Robredo, hindi pamumulitika
By Chona Yu June 27, 2021 - 11:54 AM
Walang nakikitang masama si Cagayan de Oro Representative Rufus Rodriguez kung humingi man ng assistance ang mga local government units (LGUs) sa Visayas at Mindanao kay Vice President Leni Robredo para mapalawig sa rehiyon ang kanyang programang COVID-19 Vaccine Express. Ayon kay Rodriguez, ipinaliwanag nito na kapakanan ng mga residente ang prayoridad at hindi dapat pairalin ang pulitika. Aminado si Rodriguez na maganda ang Express o Drive Thru Vaccine Initiative ni Robredo kaya nagpasaklolo na ito sa Office of the Vice President para mapabilis ang pagpapabakuna sa mga probinsya, aniya, kung sa Maynila ay nasa 600,000 na ang nabakunahan, sa Cagayan de Oro ay nasa 70,000 pa lamang habang mas mababa pa sa ilang probinsya. “Walang pulitika dito because cases in Cagayan de Oro is still very high, Davao City is still very high same with Zamboanga, Butuan City in Mindanao, Iloilo and Bacolod City in Visayas and Albay in Bicol,” paliwanag ni Rodriguez. “I asked VP Leni pero walang pulitika dito,” giit pa ni Rodriguez. Aniya, obligasyon ng mga LGUs na makakuha ng bakuna para sa kanilang.mga constituents at nakita niya ang pagkakataon na ito sa programa ni Robredo. Taliwas naman ang pananaw ni Rodriguez sa nauna nang naging pahayag ni Davao City Mayor Sara Duterte, matatandaan na kamakailan ay minasama ni Mayor Duterte ang suhestiyon ni Robredo na gayahin ng Davao City ang COVID approach ng Cebu City. Ani Robredo mas malaki ang populasyon ng Quezon City subalit nangunguna ang Davao City sa mga LGUs na may mataas na naitatalang kaso ng COVID kada araw. “The Vice President should refrain from giving advice if she knows nothing about what is happening on the ground,” nauna nang pahayag ni Mayor Duterte kung saan tinuran pa nito na kulang sa pang- unawa at kaalaman si Robredo at walang maitutulong para maresolba ang problema.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.