Pinangunahan nina Transportation Secretary Arthur Tugade at Philippine Ports Authority (PPA) General Manager Jay Daniel Santiago ang inagurasyon ng bagong Passenger Terminal Building (PTB) ng Port of Tagbilaran sa Bohol, araw ng Miyerkules.
Makatutulong ang bagong PTB upang madagdagan ang passenger capacity ng pantalan ng 497 hanggang 1,110 pasahero.
Ibinida rin ni Tugade ang 15 nakumpletong port infrastructure projects sa naturang probinsya, at maging ang anim pang ginagawang proyekto.
“Yung mga pangako na ginawa ko, tinapos ko. ‘Yung mga pangako na gagawin namin ngayon, tatapusin ko ‘ho. Ito ‘ho ang mga pangako ni Pangulong Rodrigo Roa Duterte para maipakita n’ya sa sambayanan, sa mga Boholano kung anong klase at kung gaano kalalim ang pagmamahal niya sa mga taga-Bohol,” pahayag ng kalihim.
Para naman sa pagpapaigting maritime mobility at connectivity mula at patungo sa probinsya, sinabi ni Tugade na mayroon pang apat na port projects; Ports of Jagna, Catagbacan, Getafe, at isa pang improvement project para sa Port of Tagbilaran.
Tiniyak naman ni Santiago na tutuparin ng PPA ang pangakong makumpleto ang iba pang seaport projects sa Bohol bago matapos ang termino ng Pangulo.
Pinatutukan ni Santiago kay PPA Port Management Office of Bohol (PPA PMO-Bohol) Port Manager James Gantalao ang progress rate ng bawat proyekto.
Kasama sa inagurasyon ang iba pang opisyal ng DOTr kasama sina Chief of Staff and Assistant Secretary for Procurement and Project Implementation Giovanni Lopez, at Assistant Secretary for Communications at Commuter Affairs Goddes Hope Libiran.
Present din ang mga opisyal mula sa provincial at local government ng Bohol.
