MRT-3, ilulunsad ang EDSA Carousel Bus Augmentation sa kasagsagan ng Holy Week Maintenance Shutdown

Ilulunsad ng Metro Rail Transit Line 3 o MRT-3, katuwang ang Department of Transportation (DOTr) Road Sector, ang EDSA Bus Carousel Augmentation Program, sa kasagsagan ng maintenance shutdown ng rail line sa darating na Holy Week.

Layon nitong tulungan ang mga regular na pasahero ng linya.

Ipakakalat ang mga Public Utility Bus (PUB) mula 5:00 ng umaga hanggang 10:00 ng gabi simula sa March 31, 2021 hanggang Abril 4, 2021.

Tiniyak naman ni MRT-3 Director for Operations Michael Capati na sapat ang magiging bilang ng mga bibiyaheng bus.

Ipatutupad ang tigil-operasyon sa linya ng MRT-3 para bigyang daan ang taunang maintenance rehabilitation activities ng rail line.

Kabilang dito ang pagpapalit ng turnouts, paglalagay ng mga point machine, at pagkakabit at realignment ng CCTV units sa mga istasyon ng MRT-3.

Magbabalik naman ang operasyon ng MRT-3 sa Lunes, Abril 5, 2021.