Pinakikilos ni Quezon City Rep. Alfred Vargas ang mga ahensya ng gobyerno na gumawa ng mga hakbang para kumbinsihin ang kanilang mga empleyado na magpabakuna kontra Covid-19.
Ginawa ito ni Vargas kasunod ng survey na isinagawa ng Department of Social Welfare and Development (DSWD) sa 1,000 empleyado nito kung saan lumabas na 35 percent lamang ang gustong magpaturok ng Covid-19 vaccine, 52 percent ang undecided, at ang natitirang iba pa ay ayaw magpabakuna.
Ang resulta ng nasabing survey ay naungkat sa pagdinig ng House Committee on Social Services na pinamumunuan ni Vargas.
Ayon sa kongresista, kailangang magtulungan ang mga ahensya ng gobyerno na maipaliwanag sa mga tao ang kahalagahan ng bakuna lalo na sa mga nasa frontline services na direktang nakikisalamuha sa mga tao.
Mahalaga anya na ang kumpyansa sa bakuna ay makita sa mga nasa pamahalaan.
Sinabi naman ng DSWD sa hearing na pinaigting na nito ang pag-promote sa vaccination program gamit ang information materials mula sa Department of Health (DOH).
Plano ng ahensya na magsagawa ng town hall meetings kasama ang health officials para sa mga nakatatanda at mahihirap na siyang pangalawa at pangatlo sa listahan ng mga prayoridad na mabakunahan ng Covid-19 vaccine.