BSP kabado sa financial status ng bansa dahil sa money laundering scam
Inamin ni Bangko Sentral Deputy Gov. Nestor Espenilla Jr. na mahigpit ngayong minomonitor ng world financial institutions ang Pilipinas dahil sa isyu ng $81 Million money laundering scam.
Tahasan ding sinabi ng opisyal na mahina ang Anti-Money Laundering Law sa bansa kaya nakakaranas ngayon ng mahigpit na “remittance flow” ang mga perang dapat na pumasok sa bansa.
Dahil sa nasabing pangyayari, sinabi ng BSP official na mas nagiging mabusisi ang mga financial institutions kapag nakita nilang papasok sa Pilipinas ang isang financial transaction.
Pero nilinaw naman ni Espenilla na hindi pa nakaka-apekto sa perang ipinadadala ng mga OFW ang kaso ng money laundering na iniimbestigahan ng Senado.
Pero aminado ang opisyal na posibleng tumaas ang singil sa remittances ng mga OFW na ipapasok sa bansa kapag hindi naagapan ang kontrobersiyang dulot ng dirty money mula sa na-hack na perang pag-aari ng Bangladesh Central Bank.
Nauna nang ibinabala ng ilang mambabatas na posibleng malagay sa blacklist ng Financial Action Task Force (FATF) ang Pilipinas dahil sa mahinang batas sa money laundering.
Ang FATF ay isang inter-governmental organization na nagbabantay sa money laundering at sa perang ipinaiikot ng ibat-ibang mga terror groups sa buong daigdig.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.