Power firm technician na pinagsuspetsahang espiya, pinalaya na ng NPA

Makalipas ang dalawang araw na pagkakabihag, pinalaya na ng NPA ang  dinukot nilang solar power technician sa Don Carlos, Bukidnon, Miyerkules ng gabi.

Kapiling na ngayon ng kanyang mga kaanak si Kier Selibio, technician ng Cotabato Electric Cooperative (COTELCO).

Dinukot si Selibio habang nagsasagawa ng inspection sa kanilang solar power facility sa Barangay Kabalantiano sa Arakan, North Cotabato.

Pinagsuspetsahan ang biktima na espiya ng military.

Itinanggi naman ni Engr. Godofredo Homez, manager ng kooperatiba, na pinalaya ang kanilang tauhan matapos silang magbayad ng ransom.

Nakapiring ang mga mata at nakatali ang mga kamay ni Selibio nang iwan ng mga rebelde sa bulubunduking bahagi ng national highway sa Don Carlos.