Pasado na sa ikatlo at huling pagbasa ng Kamara ang panukala para amyendahan ang batas ukol sa passport.
Sa botong 201 na pabor at walang tutol, inaprubahan ng mga kongresista ang House Bill 8513 o ang New Passport Law na magpapadali sa pagkuha ng pasaporte.
Iginiit ng may-akda ng panukala na si Deputy Speaker Rufus Rodriguez na nakasaad sa Konstitusyon na inviolable o hindi maaaring labagin ang right to travel ng isang Pilipino.
Tungkulin anya ng gobyerno na mag-issue ng passport o travel document sa sinumang Pilipino o indibidwal na makasusunod sa requirements.
Sinabi ni Rodriguez na para mapalakas at ma-protektahan ang karapatan ng mamamayan na makabyahe, dapat magtakda lamang ng ‘minimum requirements’ sa pag-a-apply ng passport at dapat bilisan ang pag-iisyu nito.
Layon rin ng panukala na makasabay ang 24 na taong gulang ng batas sa mga bagong batas ng bansa na naka-aapekto sa pagkuha ng passport gaya ng Domestic Adoption Act of 1998, Citizenship and Reacquisition Act of 2003 at ang Philippine Identification System Act.