Hindi nawawalan ng pag-asa si Marikina Rep. Stella Quimbo na sertipikahang urgent ni Pangulong Rodrigo Duterte ang House Bill 8628 o panukalang Bayanihan 3 Law.
Ayon kay Quimbo, isa sa may-akda ng Bayanihan 3, nawa’y ikunsidera ng economic managers ng administrasyong Duterte ang Bayanihan 3 bago sabihing hindi ito kakayanin dahil sa isyu ng pondo.
Napapanahon na aniya ang Bayanihan 3 lalo’t naitala na ang 9.5% contraction o pagbagsak sa Gross Domestic Product (GDP).
Dagdag ng kongresista, sana ay i-assess “objectively” ng mga economic manager ang lahat ng mga datos na lumalabas, gaya ng jobs losses o dami ng mga nawalan ng trabaho, mga nagsarang negosyo at iba pa, na dala na rin ng COVID-19 pandemic.
Naniniwala si Quimbo na kung bibigyan ng tsansa ng economic managers at sesertipikahan bilang urgent ng pangulo ang Bayanihan 3 ay maibibigay sa mabilis na panahon ang ayudang-pampamilya, pang-manggagawa at maliliit na negosyo.
Nauna nang sinabi ni Speaker Lord Allan Velasco na kailangan ang Bayanihan 3 dahil hindi pa naging sapat ang Bayanihan 1 at 2 upang makaahon ang ekonomiya at matulungan ang mga dapat pang maabutan ng ayuda.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.