Nagpahayag na rin ng pagkabahala ang Simbahang Katolika kasunod ng patuloy na pagliliyab ng bundok Apo.
Ikinalungkot ni Davao Archbishop Romulo Valles, ang nangyaring pagkasunog sa bundok Apo at aniya, ito raw ay isang senyales na kailangang higpitan pa ang mga alituntunin at pagbabantay sa mga bulubundukin sa bansa upang maiwasan na ang mga ganitong pangyayaring sumisira sa ating kalikasan.
Aniya magsilbi sana itong aral na kailangan nating magtulungan sa pagpapanatili at pangangalaga ng ating mga kalikasan.
Nananawagan din ang Arsobispo sa pagkakaisa ng lahat upang mapangalagaan ang lahat ng kabundukan sa bansa nang hindi na maulit pa ang ganitong mga pangayayari.
Simula pa noong Sabado, hanggang sa mga oras na ito, hirap pa rin na maapula ang apoy sa bundok Apo dahil sa kapal ng hamog sa kabundukan, at tinatayang daan-daan hektarya na ng lupain ang napinsala.