“Reasonable” para kay Presidential spokesperson Harry Roque ang inihaing panukalang batas sa Senado na i-institutionalize ang kasunduan sa pagitan ng Department of National Defense at University of the Philippines ukol sa presensya ng militar at pulis sa unibersidad.
Ayon kay Roque, welcome ito para maging batas.
Inihain, araw ng Miyerkules (January 20), ang Senate Bill 2002 na naglalayong amyendahan ang UP Charter of 2008.
Pero ayon kay Roque, ipinauubaya na ng Palasyo sa mga mambabatas ang pagtugon sa naturang usapin.
Tungkulin aniya ng mga mambabatas na bumalangkas ng mga batas na mayroong national interests.
Kasabay nito, sinabi ni Roque na tinanggap na ni Defense Secretary Delfin Lorenzana ang kanyang alok na gamitin ang kanyang tanggapan para magkaroon ng dayalogo kay UP president Danilo Concepcion.
Gayunman, wala pang tugon si Concepcion sa alok ni Roque.
Una rito, humihirit si Concepcion na irekonsidera ni Lorenzana ang desisyon na ibasura na ang 1989 UP-DND accord.