3 mangingisda, nailigtas sa nagkaaberyang bangka sa Cagayan

Nailigtas ng mga tauhan ng Philippine Coast Guard (PCG) Sub-Station sa Sta. Ana, Cagayan ang tatlong mangingisda ng nagkaaberyang bangka sa karagatang sakop ng bayan ng Gonzaga.

Nangyari ang naturang insidente bandang 8:30, Sabado ng gabi (January 15).

Kinilala ang mga nailigtas na sila Gilbert Ricolizado, 46-anyos; Rumolo Agadinay Jr., 45-anyos; at Sonny Ricolizado, 42-anyos, mga residente ng Barangay Minanga.

Ayon sa tatlo, nagkaroon ng sira ang kanilang port quarter at rudder na naging dahilan ng pagpasok ng tubig-dagat sa loob ng bangka.

Agad naman silang nakipag-ugnayan sa Coast Guard unit para sa search and rescue (SAR) assistance.

Matapos masagip, dinala ng PCG ang nasirang bangka sa Vicente Port sa bahagi ng Sta. Ana, Cagayan.