Ikatlong motion for reconsideration upang ipa-DQ si Poe, isinampa sa SC
Nakaka-tatlong hain na ng motion for reconsideration si dating University of the East Law Dean Amado Valdez, para hingin sa Supreme Court na baliktarin ang naging desisyon nito hinggil sa kandidatura ni Sen. Grace Poe.
Sa kanyang motion for reconsiderations, muling nanindigan si Valdez na nabigo si Poe na matugunan ang mga citizenship at residency requirements base sa nilalaman ng Saligang Batas.
Giit ni Valdez, hindi maaring gamitin ni Poe ang Republic Act 9225 o ang Citizenship Retention ang Reacquisition Act dahil tanging ang citizenship lang ang na-re-acquire ni Poe at hindi ang pagiging natural-born Filipino.
Base kasi aniya sa deliberasyon ng Kongreso, malinaw na walang balak ang mga mambabatas na ibalik sa mga repatriates ang natural-born status.
Dagdag pa ni Valdez, bukod sa hindi natural-born si Poe, minsan na niyang itinakwil ang pagiging mamamayang Pilipino.
Wala rin naman aniyang nagawang kabayanihan si Poe para isakripisyo ang Konstitusyon para sa kanya.
Matatandaang sa botong 9-6, nagdesisyon ang Supreme Court na katigan ang kandidatura ni Poe dahil wala naman silang nakitang material misrepresentation sa certificate of candidacy na inihain ng senadora.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.